Даниловский молитвослов (СИ) - Автор неизвестен - Страница 51

Слава:

Гедеон Тя руно прообрази, на Тя бо, яко роса, Христос Бог сниде, к Немуже, Богородице, молися, победу дати воинству нашему на враги, да яко Мадиамы низложив, прославим святый Твой праздник.

И ныне:

Паче солнечных луч Твоим блистающим омофором освещаеши Церковь и люди и тьму грехов наших отгониши посещением Твоим, Богородице, к Сыну Твоему и Богу за ны молящися.

Седален, глас 5

Теплая Предстательнице и непобедимая, упование известное и непостыдное, стено и покрове и пристанище прибегающим к Тебе, Приснодево Чистая, Сына Твоего и Бога моли со Ангелы, умирение дати миру, и спасение, и велию милость.

Слава Отцу и Сыну и Святому Духу, и ныне и присно и во веки веков. Аминь.

Песнь 4-я

Ирмос: Седяй в славе на Престоле Божества, во облаце легце, прииде Иисус Пребожественный, нетленною дланию, и спасе зовущия: слава, Христе, силе Твоей.

Пресвятая Богородице, спаси нас.

Во гласех пений, Дево, Тебе вопием, Всепетая: радуйся, тучная горо и усыренная Духом. Радуйся, свещниче и стамно, Манну носящая, услаждающая всех благочестивых чувства.

Пресвятая Богородице, спаси нас.

Паче Аароня кивота всю Тя Бог освятил есть Духом, Богородице, Святым, и Ангелом служити Тебе повеле, с нимиже за град и люди молися, Твой славящих честный праздник.

Пресвятая Богородице, спаси нас.

Прииди ныне в славе в Твою, Богородице, церковь с соборы всех святых, якоже иногда Тя святый Андрей виде на воздусе светлее, за христианы молящуюся, и подаждь нам Твою милость.

Слава:

Укрепи, Владычице, славящее Тя воинство наше на противныя враги, яко Давида на Голиафа; да Тебе, веселящееся, вопием: радуйся, покрове святый и Заступнице граду нашему.

И ныне:

Тебе припадаем, Госпоже, верою и, покланяющеся, благодарно вопием Ти: радуйся, Богоблагодатная Дево, покрове, и ограждение наше, и Помощнице в беде сущим, спаси нас, к Тебе прибегающих, на Тя бо надеемся.

Песнь 5-я

Ирмос: Ужасошася всяческая о Божественней славе Твоей: Ты бо, Неискусобрачная Дево, имела еси во утробе над всеми Бога и родила еси Безлетнаго Сына, всем воспевающим Тя мир подавающая.

Пресвятая Богородице, спаси нас.

Одр Тя древле Соломон написа и ложницу Небеснаго Царя, обступаему Серафимы, еже о Тебе речеся, Богородице. Тем Тя ныне молим, Мати Божия Всесвятая: покрый нас от всех бед.

Пресвятая Богородице, спаси нас.

Тебе Ангелов старейшины и честнии пророцы со апостолы яко Матери Божии честно служат, видяще Тя за мир молитву творящу; Твоя же прошения послушав, Господь спасает град и люди, на Тя надеющияся.

Слава:

Великий Тя во пророцех Исаия прорече, глаголя, Бога родити неискусобрачно: Ты бо, Чистая Марие, святейши всех была еси, Бога бо во утробе и на руку носила еси. Емуже за ны молися, Твоим осеняющи Покровом верою Тя славящих.

И ныне:

Духовными паряще крилы, святых собори тайно приидоша Тебе послужити, Богородице, видяще Тя на легце облаце славы, ко Спасу Христу молящуюся подати победу воинству нашему, погубити воюющих нас.

Песнь 6-я

Ирмос: Божественное сие и всечестное совершающе празднество, Богомудрии, Богоматере, приидите, руками восплещим, от Нея рождшагося Бога славим.

Пресвятая Богородице, спаси нас.

Иереи Богомудрии, в церкви Твоей с людьми благочестивыми предстояще, Твоей ожидают, Богородице, милости: премени на радость нашу печаль, Радость бо родила еси, всех человеков грехи отпустившаго.

Пресвятая Богородице, спаси нас.

Тебе вся земля дары приносит, яко Царице Божии Матери: архиереи кланяются и людие вси веселятся, покрываеми от всякаго зла Твоими, Богородице, молитвами.

Слава:

Гору Тя велику Даниил пронаписа: из Тебе бо без семене родися Христос и сокруши всю демонскую лесть, и всю Своея веры исполни землю. К Немуже за ны, Богородице, молися, славящия Твоего Покрова праздник.

И ныне:

Ангельский глас взываем Ти, Пречистая: радуйся, Престоле Божий, на Немже Иезекииль виде Господа в подобии человека, носима Херувимы. С нимиже за ны, Богородице, молися, да спасет души наша.

Кондак, глас 3

Дева днесь предстоит в церкви и с лики святых невидимо за ны молится Богу, Ангели со архиереи покланяются, апостоли же со пророки ликовствуют: нас бо ради молит Богородица Превечнаго Бога.

Икос

Тоя преславных чудес приидите, людие, насладимся: Сею бо Адам от тли избавися: Та бо и ковчег, не Ноем, но Богом сотворен бысть. Древле убо Моисей в купине огненней Бога видети не возможе, ныне же от Тоя Рождшагося вся земля знает Сына Божия, к Немуже за ны молится. Сего ради прославляем Ю, яко Божию Матерь: нас бо ради Богородица молит Превечнаго Бога.

Песнь 7-я

Ирмос: Не послужиша твари богомудрии паче Создавшаго, но огненное прещение мужески поправше, радовахуся поюще: препетый отцев Господь и Бог благословен еси.

Пресвятая Богородице, спаси нас.

Неисписанная многими пророки, несведома же бысть, Дево, Небесными служащими Богу Ангелы; ныне же вси вемы Тя Богородицу, и Твоея требуем помощи и заступления, Благословенная.

Пресвятая Богородице, спаси нас.

Гора усыренная Духом, юже Аввакум виде точащу верным целебную сладость, Богородице Дево, исцели ны, Сыну Твоему вопиющия: благословен Бог отец наших.

Слава:

Преклонивый небеса в Тя, Дево, вселися и ныне на молитву Твою зрит, Богородице Чистая, Твое, Царице, исполняя прошение: Емуже за ны усердно помолися, на Тя бо надеемся, Благословенная.

И ныне:

Творче, Спасе наш, Христе Боже, приими молитву Твоея Матере, юже Тебе за ны, грешныя, приносит, да Тебе, радующееся, поем: препетый отцев наших Боже, благословен еси.

Песнь 8-я

Ирмос: Отроки благочестивыя в пещи Рождество Богородичо спасло есть, тогда убо образуемое, ныне же действуемое, вселенную всю воздвизает пети Тебе: Господа пойте дела и превозносите Его во вся веки.

Пресвятая Богородице, спаси нас.

С чинми Ангел, Владычице, с честными и славными пророки, с верховными апостолы, и со священномученики, и со архиереи за ны, грешныя, Богу помолися, Твоего Покрова праздник в Российстей земли прославльшия.

Пресвятая Богородице, спаси нас.

Гордыню и шатания низложи и советы неправедных разори, зачинающих рати погуби, о Божия Мати, Царице Всечестная, православных рог возвыси, да Твой праздник славим, Пречистая Богородице Дево, зовуще: Господа воспевайте дела и превозносите Его во вся веки.

Слава:

Усты приносяще Тебе пение, и душею верно покланяемся, ибо внутрь сердца наша горят. Мати Божия Пречистая, помилуй нас, молящихся Тебе, и Господа воспевающих, и превозносящих Его во вся веки.

И ныне:

Многими отягчихся грехи, недоумею по достоянию написати Твоего Покрова, Богородице, похвалы, но яко Мати Божия украси Твой праздник чудесы, да вси, радующееся, поем Господа и превозносим Его во вся веки.