Послания - Новгородский Геннадий "святитель" - Страница 3

[1-1] Написано сверху киноварью  [2-2] В ркп. ни их.

От митрополита всея Руси

Благословение Геронтиа, митрополита всея Русии, о святом дусе сыну и сослужебнику нашего смиренна Генадью, архиепископу Великого Новагорода и Пскова. Писал еси к нам свои грамоты, к господину и сыну моему к великому князю Ивану Васильевичю всея Русии, да и ко мне, о том, что прозябают ереси в Новегороде, хулы и поруганья от священников, и от дияконов, и от дияков, и от простых людей, да и списке еси на тех ересников прислал к нам, по чему еси обыскивал, как они хулили Христа сына божиа и пречистую его богоматерь и ругались святым иконам, а величают жидовскую веру, а нашу православную християнскую веру хулят: и мы то дело с господином и сыном своим, с великим князем, и со всем православным собором поразсудили: что в твоем списке писаны, поп Григорей Семеновской, да поп Ересим Никольской, да попов сын Григорьев Самсонко диак, и те, по святителским правилом и святых апостол и святых отець, достойни извержению и отлученью от святые церкви и проклятью подлежат, потому что на них в твоих спискех сведетельства есть о их ересех и хулах и о поруганьи; а по царскым правилом, от божественаго писаниа, достойны градскыа казни. И князь великий велел тех трех казнити, попа Григорья, и попа Ересима, да и Самсонка диака, градскою казнию, да казнив, послал их к тебе: и ты, сыну, у собя, в своем зборе, тех обличив да понакажи духовне, по правилом святых апостол и святых отець, как достойно по божественому писанию, чтобы они покаалися и в разум истинны пришли; и толко покаются, да будут достойни милости; а не покаются, и ты их пошли к наместником великого князя, и они их тамо велят казнити градскою казнию, по великого князя наказу, как писано в царскых правилех. А Гридя диак не дошел ешо, по правилом, градские казни, потому что на него один свидетель, поп Наум: и ты того тамо обыскивай, и что на него обыщешь, по правилом, казнь духовную или градскую, ино то сам ведаешь. А которых еси иных писал в своих спискех, священников и диаконов и диаков и простых людей, что те лихие дела делають, и ты бы того обыскивал с великым прилежанием и со многим извещением, как нам велено по божественому писанью безпрестанно пещися о духовных вещех. А князь великий приказал с тобою того дела обыскивати наместником Якову да Юрью Захариичем: и ты бы с ними того дела обыскивал вместе. И которые дойдут, по правилом, твоей святительские духовные казни, и ты их духовне казни; а которые дойдут градские казни, ино тех наместники великого князя казнят градскою казнью. Да обыскивал бы еси, сыну, то дело прилежно, чтобы христианьство в змущеньи не было, а церковь бы божиа безмятежна была. Да будет на тебе милость божиа и нашего смиренна благословение.

Послание архиепископа Геннадия Новгородского Иоасафу, бывшему архиепископу Ростовскому. 1489 г., февраль

«Послание Геннадия Иоасафу Ростовскому» — памятник, содержащий не только полемику новгородского владыки с его противниками, но и ценнейший список книг, которые у еретиков «все есть», — издавалось дважды: оба раза в «Чтениях» ОИДР. В первый раз оно было издано в «Чтениях» за 1847 г., № 8 (отдел «Смесь»). Издание это (подготовленное историком церкви Филаретом епископом Рижским, впоследствии Черниговским) было совершенно неудовлетворительным даже с точки зрения археографических принципов XIX в. В тексте было опущено без всякой оговорки вступление и несколько мест в середине (в том числе пропущено одно название в списке книг новгородских еретиков), ряд мест был неправильно понят и транскрибирован и т.,д. Рукопись, по которой был напечатан текст, была неправильно определена как «пергаменная», — в действительности эта рукопись бумажная. Недостатки этого издания побудили редакцию «Чтений» переиздать послание вторично, — на этот раз рукопись была издана в «Чтениях» за 1880 г., № 3, среди «Библиографических материалов», собранных известным археографом А. Н. Поповым (стр. 140). Издание это несравненно лучше предыдущего, но текст напечатан церковно-славянским шрифтом (в первом издании шрифт был русский), и не проставлена современная пунктуация. В настоящем издании использован тот же, единственно известный нам список, который использован и в «Чтениях»: 1) БИЛ, Троицк. № 730; 4°; нач. XVI в. Сборник (разные почерки и бумага, но все перв. пол. XVI в.)—«Палея» с прибавлениями. Л. 204 — «Менандра мудрого разуми» (см. выше, стр. 143—144); л. 246 — «Послание Геннадия Иоасафу»; л. 485 — «Послание Дмитрия Грека Геннадию» (о «седьмой тысяче»). Подробное описание см.: Описание славянских рукописей библиотеки Троицко-Сергиевой лавры, ч. III. M., 1879, стр. 119. * * *  Генадие, милостию божиею архиепископ Великого Новаграда и Пъскова святейшему и боголюбивому о святемь дусе Иосафу бывшему архиепископу Ро стовьскому и Ярославьскому достойную и духовную любовь сим нашим писаниемь въспосылаем боголюбию твоему, яко да будеши в здравии всесвященне и духовне и телеснее. Мню, яко не неведомо твоему святительству церковный раздор от еретичьскаго нападания, что есми посылал подлинникы великому князю, да и митрополиту, отцу его, и митрополит деи то и вам являл, те великие скрьби, иже от начала не бывали в Руской земли. А и тамо в Цариграде, отнеле же Константин Великый пръвый събор съвокупи на Ариа, оттоле смесь была до Феофила иконоборьца, православныя цари, да и еретики были[1], ино православных те болши было: православных было 30 без одного, а еретиков было 12, и с Феофилом иконоборцем. И как Михаил православный Феофилов сын, учинил православие, той бысть от прьваго царя Константина 43-й православный царь. И оттоле всех тех царей православных было от Михаила до Калуяна царя — 42, а ни при одном не было дръзновениа жидовьскаго и еретичьскаго в Цариграде и до сех мест. А отнеле же князь велики Володимер Киевьскый крестил всю землю Рускую, а тому 500 лет с летом, а того ни в слуху не бывало, чтобы быти в Руси какой ереси. И как избрание сътвори господин наш и отець Геронтей митрополит всея Руси с вами архиепископы и епископы и еже о нем священный събор, и с благоволением и с советом сына своего, государя нашего великаго князя Ивана Васильевичя всея Руси, послали мене на архиепископью Великаго Новагорода и Пьскова, не по моему достоиньству, еже не ослушати ми ся было своего господина и отца Геронтиа митрополита всея Руси. И обретох здесе новугородскых еретиков, жидовьскаа мудрьствующих. Покрыты же суть онехь еретик клятвеною укоризною, марькианьския глаголю и месалианскиа. Сии бо, егда въпрашаеми, о своих велений отметници бывают, и безстудно и усръдно кленутся, и проклинают вся тако мудрьствующаа или мудръствовавших и ротятся без страха, яко таковаа повелениа ненавидящим. Сице и сии еретици говорят явьствено, и учат православное христианство своей злобе, и как их спроси, и он говорит: яз, деи, православной христианин, а того всего своего лихово дела запрелся. Ино то в них не одно июдейство, смешано с месалианскою ересью. Сиа главы в правилех у себе изнайдешь; а то ми накрепко высказал их товарищь поп Наум. Да и псалмы ко мне принес, по чему они себе правили по-жидовскы. И те яз псалмы послал к митрополиту же с подлинником. Да потом государь мой князь великый приказал своим бояром, Якову да Юрью Захариичем со мною и своим богомолцемь обыскати того накрепко. И как мы тех еретиков велели пред собою поставите, и они те все своих действ позапрелися, да почали с безстрашиемь клятися, а называют ся христиане православные. Ино было как то все уведати по их клятве, как они отметаются своих велений? И попы их завтрокав и пив до обеда, обедню служат. А что они кленутся без страха, а то в 19 главе тех же ересей месалианскых явлено. А что недостойно служать божественную литургию, а то явлено в 12 главе тех же ересей. Да что ни есть ересей месалианскых, то все они мудрьствують, толко то жидовскым десятословиемь людей прелщают, яко чествующе мнятся. Да та прелесть здесе распрострелася, не токмо в граде, но и по селом. А все от попов, которые еретики ставили в попы. Да егда будут где православных, и они таковых же себе являют. Аще ли видят кого от простых, и они готова себе на лов имеют. Да того ради и в попы ся ставят, чтобы кого, как мощно, в свою ересь привести, зане ж уже дети духовныя имут дръжати. И кто будет верою огражден и в православии христианства крепок и они того таятся, а ему таковы ся являют. Аще ли кто слаб и леностен и удобь к греховному игу прекланяем, сего они, яко слаба, отступника вере показуют[2] и приимают его в свою ересь. Да что он согрешил, или блуд или прелюбодейство, или ины грех сътворил, то удобь пращают, церковным каноном не последующе. Аще ли пакы кто от православных в обличение въсхощет стати на них про их ересь, и они отметници бывают своих ересей, да и проклинают всех такова творящих, да и ротятся без страха. А сами то творят, да греха себе в той клятве не ставят. Ино как же их мощно было доити, аще бы князь великый не приказал своим бояром со мною, своим богомолцем, того обыскати? И молитвами пречистыа богоматере и его государьскою грозою с его бояры, с Яковом да с Юрьем Захариичи, того есмя обыскали накрепко, да и явьственно то учинили своему государю великому князю, да и отцу своему митрополиту, да и вам, своей братии, архиепископом и епископом. И как мню, ныне вы положили то дело ни за что, как бы вам мнится, Новъгород с Москвою не едино православие; не поболезновали есте о том ни мала! Ты будешь нечто оскорблен от кого в телесном деле, да оставил архиепископью, да предал еси овци влъком на расхищение, а слыша таковую беду церковную. А где бы в то время тръпением великим въоружитися, аще бы что и пострадати за православие душевныя ради пользы, чая от господа бога за то мьзду восприяти! Да понезазриши ми, что есми к твоему боголюбию писал, поминая рекшаго: «Дай премудрому вину, премудрее будет, обличай премудраго, възлюбит тя». Да и се в слух мой пришло, что, деи, посылал по тебе князь великы, и не одинова, и ты, деи, не поехал к нему, а могл бы еси и тамо крепость свою подрьжати, за что будешь оставил архиепископью, а государьское бы еси сердце не ожестил. Да не мни: то мал грех сътворил еси; что ся ни учинит пакость какова христианьству в твоей архиепископии, или бы еси церкви каковую управу учинил в ту пору, ино то все на твоей голове легло. Да однова нечто государь князь великый въспалу учинит и на монастырь тебе же для, ино тебе и за то ответ дати. Да не позазриши ми о том, что есми тебе писал, сердечне жалуя того, что однова от бога за то в гресе будешь. Зане же иной тебе того стыдится млъвити, или и не смеет. А многы люди добрые духовные тому зазрять. А яз то от слуху же слышел. И только то будет так се, и яз совет тебе даю, однова нечто бог положит государю на сердце, пошлет по тебе, и ты бы ся никако не ослушал, тамо пакы приехав к нему. Какову себе крепость хочешь о своем деле, тако учинишь, толко бы ся князь великы у тебе того не опросил. А ныне бы еси о государе о великом князи бога молил, чтобы государю бог положил на сердце, чтобы управил церковь божию, а православное бы христианьство от еретичьскаго нападаниа, от тех еретиков, жидовьская мудрьствующих, непоколебимо было. Понеже образу господа нашего Иисуса Христа и пречистый его матери наругалися! А слышел еси в подлиннике, како о них писано. Да чтобы еси послал по Паисея, да по Нила, да с ними бы еси о том посоветовал: «Преидут три лета, кончается седмая тысяща». [3]Ино и яз слыхал у Алексея[3]: «И мы, деи, тогды будемь надобны». Ино еритици себе надежно чинят! Да и Шестокрил есми учил того для, и обретох в немь ересь: числа поставлены — от Адама 200 и 70 и 6 девятнадесятиць! Ныне идеть шестаа девятиадесятица по чему жидова лета чтут. Ино то учинили на прелесть христианьскую. Хотять рещи: лета христианьскаго летаписца скратишась, а наша пребывают. А то хотят ту прелесть явити, како изойдеть наша' паскалиа. Занеже я испытно Шестокрил прошел, да и написан у мене. Ино те числа, что поставлены, 276 девятнадесятниць, лет будеть от Адаама до сех мест 5000 и 200 и 28. И потому ино у них еще пришествиа Христова нет, ино то они ждуть антихриста. Ино прелесть великаа! А еуангелие кончины не явлено, когда будеть. Да и Енох праведны писал сице: «Преж даже вся не бышя, постави бог века тварнаго, и потом сътвори всю тварь видимую и невидимую и по всем томь създал человека в образ свой. И тогда раздели бог век человека ради на времена, на лета, и на месяци, и на дни, и на часы, — и да разумеет человек времен премену и чтеть своеа жизни конець. И егда скончается вся тварь, юже сътвори господь, тогда времена погибнут, и лета не будеть к тому, дние и часы не почтутся. Но станеть век един, и вси праведници убежат Суда великаго и прикупятся велицем веце и век велик прикупится праведницех» и прочаа. И яз нашел в писании, что которой царь по котором был, и колко лет которы царь жил; таже которой патриарх по котором был, да и колко лет жил. А пишет их епископы, а не патриархы. Ино написано сице: мирскых лет 5000 и 600 и 21, а от божественнаго воплощения лет 121, римьскы епископ 9 Угиин лета 4, а Ерусалиму епископ четвертыйнадесять Иосиф, лета два, таче Иерусалиму же епископ 15 Июда, те были крещены от июдей при том Июде Андреаном, конечное и последнее пленение градное и жидовское быть. Да посем пръвый епископ Марко лет 8 был, от язык необрезаных. Ино тамо писано: лет 5000 и 600 лет и 21, внеже лето и пленение их бысть последнее. И оттоле до сех мест 400 лет да 1000 в гневе божии пребывають. Да аще к тому безстудствують, развращающе наше православие, яко же о них писано: ни сами входяще, ни хотящих внити оставляюще. Да что которые лета у нас украли еретици жидовьскыми числы, и в те лета которые цари, иля папы, или патриархи писаны по именомь, ино тех где вмещати? Ино надобе о том подвиг велик дръжати, егда скончаются лета, а животом еще прибавит[4] бог мир. Ино то еретикомь жидовьскаа мудрьствующимь будет дръзость, а христианству будет спона велика. А списавы Зръцало, то яко гаданием положи 7000 лет, глаголя сице: «По домыслу убо реша мнози глаголюще: понеже в 6 дней сътворен бысть мир сей, и скончаваеме убо шестой тысящи быти и скончание миру; слъгаша же тии, рече. Глаголють же пакы друзии, яко понеже есть седморичен настоящий сей век, лепо есть пребыти миру дондеже и седмаа тысяща скончается, яко же Соломон рекл есть: даждь часть убо седмым, и тогда осмому, седмь бо век деланна, осмы же будущаго века образ носить. Но и се речение не благословно ми мнится. И пакы покаряюся, рече, Григорию Богослову глаголющу: егда горний мир наплънится, тогда ожидай скончаниа». А что Шестокрил они себе изучив, да тем прелщают христианство, мня, яко с небесе знамение сводять; ино то не их съставлениа бысть! Шестокрил бо взят от астрономии, яко капля от моря. А то звездозаконие дано бысть Сифу, третиему сыну Адаамову. Да потомь Енох списал праведны дни и часы и лета, и потом Ной последнему роду предаде. Авраам в Египет вшел, египтяна учи землемериа, да и росчет земны. Да потом и жидова от них по тому навыкли. Егда же Филаделфь Птоломей, по Алексаньдре Макидонстем, над Египтом царствова, сей посла ко Азарии, иже тогда в жидовьстей стране пръвосвященнику, избрати от художнейших в разуме, иже закон истлъковати могущих. Архиерей же усмотрив, иже у него искуснейших жидов, иже отечьское и еллинское навыкли беша наказание, и от коегождо племени 70 и два мужей избрал, с радостию посылаеть ко Птоломею. Они же в различных клетех по двема, или по единому разделшеся в Фаре, Александрестемь острове, все божественое писание и сия псалмы, сиречь псалтырю, истлъковавше, и вси в тлъковании съгласиша, яко же дивитися Птоломею. Быть же 70 и двоих сих изложение прежде трею сот и единого лета спасова пришествиа. И оттоле распространилося то преведение в еллиньском языце, и от еллинскаго языка преиде в латынскы язык, за 300 лет до Христова пришествиа. А жидова как распяли Христа, так их в пленение предал бог, да и книги их истреблени бышя. Таже в лета Андриана грецкаго самодрьжца Акила от Синопиа, от еллиньства в христианство преложься, таже в иудейство уклонися, обрадовано жидовом тлъкование изложи. По сем же при Севире, иже от Самариа Симмах еретику Маркиону беседовав, и възвестив самаритом, и сего ради иудейская избрав благодействует им растленны в изложении смысл. По тех же при Комоде цари Феодотион, иже от Ефеса свяшенныя книги зле и разверащение изложи. Нам же священномученик Лукиан, при Диоклитиане мучители, жидовьскыя книги в нашу беседу предлагает, добрее же и твердейте. Мы же таковое[5] изложение почитающе и 70 тих и двоих прилежим паче, яко разно языку преложение сътворшиимь един коегождо разум и беседу издаше. Ино нынешнее жидова еретическое предание дрьжать, псалмы Давыдовы или пророчьства испревращали по тому, как им еретици предали — Акила и Симмах и Феодотион по Христове пришествии и по пленении их, а не яко же нам предали святии апостоли и святии отци тех от мудрых, еже превели жидовьскы закон на еллинскы, за 300 лет преже Христова пришествиа; ино то и достоверно есть, ниже тогда еретици быша. По Христове бо пришествии и по проповеданию святых апостол, сие предание, еже есть 70 тих и двоих преложение, истолковаша святии отци, Давидом реченнаа в псалмех, и еже пророцы глаголаша о Христе. Ино мнит ми ся по Еноху век работает человечьству, а седмь тысящь лет человечьска ради пременениа положена. А по Богуслову и нам на всяк час ждати скончаниа. Да и то ми ся мнит: однова будут еретици у нас украли лет! Занеже у латыны нашего болши осмию леты. Да еще говорят: «У нас, деи, писано седмь тысящ лет да 8 до скончаниа века». И яз их съпросил: «Что ж тлъкуется 8?». И они млъвят: «То, деи, тому слову имя: аще будете добри, придам вам, аще ли будете зли, уйму вас». А татарове сказывают: еще у них до скончаниа миру, сииречь до второго пришествиа христова, 100 лет да два. И се писано: «Седмь век деланья, осмый же будущаго». Ино нам 6 день в недели велено делати, а седмы покой приимати от трудов. И будет однова в нашей паскалии деланиа время не исполнилося, и ты бы о том с Пасеем да с Нилом накрепко поговорил, чтобы есте и ко мне описали о том. Да и о том ми отпиши: мощно ли у мене побывати Паисею да Нилу, о ересех тех было с ними поговорити? Да есть ли у вас в Кирилове, или в Фарофонтове, или на Каменном, книги: Селивестр папа Римскы, да Афанасей Александрейскы, да Слово Козмы прозвитера на новоявлыпуюся ересь на богумилю, да Послание Фотея патриарха ко князю Борису Болгарьскому, да Пророчьства, да Бытия, да Царьства, да Притчи, да Менандр, да Исус Сирахов, да Логика, да Деонисей Арепагит?[6] Зане же те книги у еретиков все есть. Да чтоб еси себе мнения не подръжал. Занеже не нашо дело гнев дръжати. Будет твой сын боярьской невежливо приехал, ино ведь по посольству и ответ дается. И ты ныне задняа забывай, а на предняа простирайся. Где пак будут наши недостаткы, или неведением что будем учинили, и ты бы то нам также простил, яко господень ученик рекшаго: «Аще съгрешит к тебе брат твой, глаголя: каюся, остави ему». Да и о том еще воспоминаю твоему святительству, аще будешь съвершено оставил той великы святительскы сан, хотя смерениа образ въсприят, да не запнеть враг предложениа твоего, преднося помысл кичениа, въспоминаа велико что сътворив. Но паче подобает ти имети помысл всегда уничижен, поминая Закхеем реченнаа «Аще кого чем изобидех, да въздамь четверицею». Сия и законом положена быша. Аще ли речеши: «Несмь обидех никого же», ино от служащих твоих кто будеть изобидел, хотя и тебе неведомо, а отвечати тебе же за то; занеже секира без секущаго не сечеть, сице и слуги наши не могуть никого изъбидети аще не от нас будуть власть прияли. Ползы бо ради сия писах тебе, поминаа рекшаго: друг другом подкрепляем яко град тверд. Да и тебе молим тя, еще что услышишь о наших недостатках, еже будеть зле творимаа нами, такожде писанием възвести нам, а то мне от тебе за великую любовь. А милость господа бога вседержителя, и его пречистыя богоматери и нашего смерениа молитва, купно же и благословение, да есть всегда с твоим святительством и боголюбьем. Аминь. Бывшему архиепископу Ростовьскому и Ярославьскому, Иасафу. В лето 6997 [1489], февраля 23, 24, 25 преписахь сие послание; в грамоте строк девяносто и 5.